ភ្នំពេញ៖ អភិបាលខេត្តស្វាយរៀង បង្ហាញការគាំទ្រនិងផ្ដល់នូវកិច្ចសហការដល់ដំណើរការស្វែងរកអដ្ឋិធាតុរបស់យុទ្ធជនកងទ័ពស្ម័គ្រចិត្ត និងជំនាញការវៀតណាមទាំងអស់រហូតដល់ពេលដែលអដ្ឋិធាតុទាំងនោះបានធ្វើមាតុភូមិនិវត្តន៍ទៅស្រុកកំណើតវិញ។

នៅក្នុងឱកាសជួបជាមួយគណៈប្រតិភូ ខេត្តឡុងអាន និងជាប្រធានគណៈបញ្ជាការ ៥១៥ ខេត្តឡុងអាន លោក ផាម តឹនហ្វា នៅថ្ងៃទី៥ ខែមេសា ឆ្នាំ២០២២ អភិបាលខេត្តស្វាយរៀង លោក ម៉ែន វិបុល បានឱ្យដឹងថាបច្ចុប្បន្នក្រុមការងារខេត្ត (ស្វាយរៀង-ឡុងអាន) កំពុងរួមគ្នាអនុវត្តភារកិច្ចសហប្រតិបត្តិការរុករក គាស់ប្រមូលផ្តុំអដ្ឋិធាតុយុទ្ធជនវៀតណាម ក្នុងភូមិសាស្ត្រខេត្តស្វាយរៀងក្នុងដំណាក់កាលទី២១ (រដូវប្រាំង ២០២១-២០២២)។

លោកអភិបាលខេត្តថា កាលពីឆ្នាំ២០២០-២០២១ សកម្មភាពការងាររុករក គាស់ ប្រមូលផ្តុំអដ្ឋិធាតុយុទ្ធជនវៀតណាមក្នុងភូមិសាស្ត្រខេត្តស្វាយរៀង មានការខកខានមួយដំណាក់កាល (ដំណាក់កាលទី២០) ដោយសារបញ្ហានៃជំងឺកូវីដ-១៩ ទោះជាយ៉ាងណាអាស្រ័យដោយស្ថានភាពធូរស្រាលនៃជំងឺកូវីដ-១៩ ក្រុមការងារសហការរបស់ខេត្តទាំងពីរ ក៏បានចាប់ផ្ដើមដំណើរការឡើងវិញ តាមរយៈការចុះកំណត់ហេតុរួមគ្នាកាលពីថ្ងៃទី១៦ ខែកុម្ភៈ ឆ្នាំ២០២២ កន្លងទៅ។

រដ្ឋាភិបាលកម្ពុជា និងវៀតណាមបានចុះហត្ថលេខាលើកិច្ចព្រមពញរៀងមួយកាលពីថ្ងៃទី២៨ ខែសីហា ឆ្នាំ២០០០ ស្ដីពីការប្រមូលផ្ដុំនិងការធ្វើមាតុភូមិនិវត្តន៍អដិ្ខធាតុរបស់កងទ័ពស្ម័គ្រចិត្តវៀតណាមដែលពលី ក្នុងសង្គ្រាមនៅកម្ពុជា។

ប្រតិបត្តិការរុករកអដ្ឋិធាតុរបស់កងទ័ពវៀតណាម ត្រូវបានធ្វើឡើងជារៀងរាល់រដូវប្រាំង។ គិតត្រឹមឆ្នាំ២០១៧ នៅសល់អដ្ឋិធាតុរបស់ទាហានវៀតណាមជិត ៤ពាន់នាក់ទៀតនៅកម្ពុជាមិនទាន់រកឃើញនៅឡើយ៕